’t Plaetje is kompleet!

Geer sjtèlle v’r aan uch veur!

Cas Notermans, Myrthe Janssen & Stan Lumens

Ès Prins Cas I, Prinses Myrthe & Jeugprins Stan II

PRINS CAS I

Ich bèn Prins Cas I, of baeter bekènd es Cas Notermans, 23 jaor jòngk en gebaore in Zitterd. Ich höb ein breurke Gus van 21 jaor oud en zösterke Rafke van 17 jaor. Saame mit de pap en mam woone veer oppe Heisjtraot in Einekoeze, hiej bèn ich in ‘t weekend vaak en väöl te vènge. Door de waek woon ich in Breda, want dao volg ich ‘t 2de leerjaor van de opleiding Fysiotherapie. Ich wirk daonaeve biej Sportvision, hiej gaef ich groepslesse en begeleid ich de luuj in de fitnesszaal. Zo kèn ich mien fysiokennis gout gebroeke in de praktijk. Vreuger höb ich ummer gevoetbald, maar noe ich op zunjig wirk ben ich hiej mit motte sjtoppe. Mien hobby is meziek maake oppe trompet biej Fanfaar Concordia en kapel Neuge pils & eine sjoes. Vanoet dees kapel zit ich ouch biej de vrunjegroep de Zoep van 11. Hiej mit gaon veer jeder jaor mit de prins mit op sjtap. Daonaeve ben ich eine fanatiek dartsleefhöbber, ein pielke gooije kènt d’r ummer waal in. En op tillevisie mis ich gein wedsjtried. Ich vier de vastelaovend jeder jaor in ‘t Smautbulenriek en soms in Zitterd.  In 2005 bèn ich al Jeugprins gewaes biej de Smautbulen. Ich vèng ‘t sjoon wie ‘t ummer tradisiegetrouw gevierd wurdt in Einekoeze. ‘t Is dan ouch ein ganse eer om Prins te mooge zeen van de Smautbulen. ‘t Is mit de paplaepel ingegaeve, de pap en mam viere jeder jaor aktief vastelaovend in ‘t Smautbulenriek en miene opa is vruiger ouch Prins van de Smautbulen gewaes.  Ich bèn biezunjer greutsj det ich ein charmante Prinses aan mien ziej höb! 

PRINSES MYRTHE

En die Prinses det bèn ich! Myrthe Janssen, veur de meiste mèssjiens nog eine vraeme vogel omdet v’r pas 1,5 jaor saame zeen. V’r höbbe òs ontmoet oppe sjportsjool wao Cas wirkt en ich ging sjporte. Ich bèn 22 jaor jòngk en woon in Aelse biej de pap en mam thoes. Ich höb eine broor Luc van 24 jaor oud dae noe op Aruba woont. Ich bèn ‘t aafgeloupe jaor aafgesjtudeerd és HBO-Verpleegkundige en wirk biej de Buurtzorg Gelaen-Oost. Normaliter bèn ich eine fanatieke volleybalster biej ADC dames 1. Helaas bèn ich aafgeloupe oktober geblesseerd geraak en geopereerd gewaore aan de kneej. Dit beteikent ein lange revalidaasie en veur noe ‘t eindj van ‘t sezoen. Noe bèn ich dan ouch ein trouwe supporter! Tied doorbrènge mit vrunj en femilie is belangriek veur mich. Aafgeloupe sezoen höb ich veur ‘t eesj vastelaovend mooge belaeve in Einekoeze. Dit beveel mich metein gout! ‘t Knusse dörp en de luuj zeen mich gout biejgebleeve. De jaore daoveur höb ich vastelaovend gevierd mit C.V. Boemzaat, woo veer ouch optochte mit leepe. Vruiger leep ich ummer achter de Jeugprins aan en zelf bèn ich oppe basissjool Jeugprinses gewaes, ich vòng ‘t dan ouch jaomer det allein jonges Prins koosjte waere. ‘t Is veur mich dan ouch ein druim die oet is gekomme om Prinses te zeen van, biej en naeve Cas. Es Sajelair gebaore, bèn ich noe dan toch ein bietje eine Smautbuul gewaore!

JEUGPRINS STAN II

Miene naam is Stan Lumens, ich bèn 11 jaor auwt en gebaore op 14 fibberwaarie in ‘t ziekehoes van Zitterd ein paar daag veur de vastelaovend. Ondanks det ich in Zitterd gebaore bèn waar ich toentertied mit de sjleuteleuverdrach sjus thoes om miene eesjte vastelaovend in ‘t Smautbulenriek te mooge belaeve. Nae, ich veul mich geine Marot, mer geweun eine echte Smautbuul! En eine echte jong van Einekoeze. Ich woon saame mit mien pap en mam en miene groote broor (Auwt Jeugprins Luuk I) oppe Heisjtraot in Einekoeze. Ich vier de vastelaovend al 11 jaor in Einekoeze en nurges angesj. Hiej is ‘t te doon! De vastelaoveskriebels höbbe pap en mam mich mit de paplaepel d’r in gegaote. Zie (pap en mam) zeen mich al veurgegange es groot Prinsepaar van de Smautbulen en miene broor Luuk is al Jeugprins gewaes. Ich zit in ‘t lètste jaor van miene sjooltied op SBO de Blinker in Gelaen, volgend jaor gaon ich nao Maaseik naor sjool woo miene broor Luuk ouch al op sjool zit. Es ich neet op sjool bèn, dan vèngse mich achter de playstation Fortnite sjpeele mit al mien vrunj.

Es ich neet achter det dèngk zit, dan bèn ich boete te vènge, vaak op miene motorskelter dae pap mich haet geboewd. Ich hawt van crosse thoes op ‘t graas in de tuin of biej vrunj in de wei. Soms doon ich ‘t röstig aan en dan riej ich röstig rondj op miene traktor. Ram sjiek vèng ich det! Maar nog sjieker vèng ich de grote Lanse van de Buurman, geer wit waal van zo ein gans auwerwètse traktoren, ich kiek mich ummer de uig oet dao! Maar jeh, mos klein begènne he.. Eigelik is ‘t sjus wie ‘t Prinssjap doe mos klein begènne en langzaam aan opboewe, zo bèn ich namelik al Jeugprinske gewaes biej KDV Twinnie, de Triangel èn oppe BSO! Noe is ‘t dan eindelik tied veur ‘t echte wirk, nao jaore mit höbbe geloupe achter pap aan, mit de raod mit op sjtap, daag, waeke en late aovende. Moog ich dan noe de kar saame mit ‘t groot Prinsepaar gaon trèkke ès JeugPrins van de Smautbulen. Ich gao mich dan ouch veur 111% gaeve en geneete van alle oetsjtèpkès, activiteite, feestaovende en netuurlik de vastelaovend in ‘t eige dörp! Ich kiek dan ouch oet om hiej veurop te gaon es Jeugprins Stan II, Alaaf!